कविता ३ - कविता माझी, तुझ्याच साठी..

कविता माझी, तुझ्याच साठी.. 

फोटो - शुभम कांबळे

अधुरे मन अधुराच मी,
अधुरी बनून पूर्ण मला तू करशील ना ?
मी झाड एकटे टेकडीवरती,
मखमली तो स्पर्श तू वारा बनून करशील ना ?

तहान लागता तुझ्या प्रीतीची,
बरसात प्रिये तू करशील का ?

सांज वेळी निवांत किनारी,

मंद झुळूक झेलताना उरी,

माझ्या अबोल चेहऱ्यावरती,

तुझी ओढणी मुद्दाम सोडशील का ?

तहान लागता तुझ्या प्रीतीची,

बरसात प्रिये तू करशील का ?

डाळिंब टच्च तुझ्या ओठांवरती,
उमटवत गीत माझे तुझ्या प्रीतीचे,
खांद्यावर माझ्या माथा टेकवत,
ते गीत माझ्यासाठी गाशील ना ?

फोटो - अविनाश जाधव 

तहान लागता तुझ्या प्रीतीची,
बरसात प्रिये तू करशील का ?

केस सुगंधी सुमनांत तुझ्या त्या,

या भ्रमरास बंदिस्त तू करशील का ?

माथ्याला तो टेकून माथा

गोष्टी सुखाच्या करशील ना ?

तहान लागता तुझ्या प्रीतीची,

बरसात प्रिये तू करशील का ?

येऊ नये त्या दुःख समयी तू,
माझाच खांदा ओलावशील ना,
संकट समयी हातात हात
भरल्या नयनांनी माझ्याच नजरेत पाहशील ना !!

तहान लागता तुझ्या प्रीतीची,
बरसात प्रिये तू करशील का ?

- तुषार